Դեսպան Մինասյանի մասնակցությունը «Հայոց Ցեղասպանություն և Հոլոքոստ» խորագրով տեսակոնֆերանսին

05 հուլիսի, 2021

Հուլիսի 5-ին Ռումինիայում Հայաստանի Հանրապետության արտակարգ և լիազոր դեսպան Սերգեյ Մինասյանը հեռավար ձևաչափով մասնակցեց «Հայոց Ցեղասպանություն և Հոլոքոստ» վերնագրով միջոցառմանը, որը Ռումինիայում ԱՄՆ դեսպանության, Ռումինիայում Միջազգային կրթության ամերիկյան խորհրդի, Ռումինիայում Իսրայելի և Նիդերլանդների Թագավորության դեսպանությունների ու Էլի Վիզելի անվան Հոլոքոստի ուսումնասիրության Ռումինիայի ազգային ինստիտուտի համագործակցությամբ կազմակերպված “Elie Wiesel” թեմատիկ ճանաչողական ծրագրի մի մաս է կազմում: Միջոցառման հիմնական բանախոսն էր Բուխարեստի համալսարանի Քաղաքագիտության ֆակուլտետի պրոֆեսոր Օանա-Վալենտինա Սուչուն:

Միջոցառման սկզբում դեսպան Մինասյանը հանդես եկավ ներածական խոսքով՝ կարևորելով Հայոց ցեղասպանության ուսումնասիրության գիտական և ակադեմիական նշանակությունը, և ընդգծելով որ Հայոց ցեղասպանության և Հոլոքոստի միջև համեմատական վերլուծությունը նպաստում է ինչպես Հայոց ցեղասպանության միջազգային ճանաչման գործընփացին, այնպես էլ ապագայում մարդկության դեմ հանցագործությունների և նոր ցեղասպանությունների կանխարգելմանը:

Դեսպան Մինասյանն ընդգծեց նաև, որ 2020թ. աշնանը Արցախի դեմ թուրք-ադրբեջանական ագրեսիան մեկ անգամ ևս ի ցույց դրեց Հայոց ցեղասպանության ճանաչման ու դատապարտման անհրաժեշտությունը՝ ապագայում նման հանցագործությունների կանխարգելման տեսանկյունից:

Պատասխանելով միջոցառման մասնակիցների հարցերին՝ դեսպան Մինասյանը անդրադարձավ առկա աշխարհաքաղաքական որոշ զարգացումներին, ներկայացրեց Ռումինիայի դիրքորոշումը Հայոց Ցեղասպանության հարցի առնչությամբ ու Հայոց Ցեղասպանության ազդեցությունը ռումինահայ համայնքի կազմավորման վրա, ինչպես նաև ռումինական պետության և հասարակության անուրանալի դերակատարությունը Հայոց ցեղասպանությունից մազապուրծ եղած հայերին Ռումինիայում ընդունելու ու ապաստան տրամադրելու գործում:

Պրոֆեսոր Օանա-Վալենտինա Սուչուն հանգամանալից ներկայացրեց Հայոց ցեղասպանության պատմությունը, դրդապատճառներն ու հետևանքները, միջազգային ճանաչման գործընթացը, Թուրքիայի հետևողական ժխտողական քաղաքականությունը և միջազգային հանրության մոտեցումները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր